Welsh Zone

صباح الخير .. بعد ما إتكلمت ( هنا ) عن إستبدال التليفزيون العادي .. بمواد مختارة تشتغل على "لابتوب" وتتعرض على شاشة التليفزيون علشان نحمي ولادنا من الأفلام العربي اللي زي أفلام السبكي وأمثاله أو من الأفلام الأجنبي اللي ممكن يسمعوا/يشوفوا حاجات مش وقتها في السن الصغير. ناس كتير تفاعلوا وبعتبولي بيقولولي لو عندك نصايح تفيد في التربية :D - أولا مش متخصص .. يعني اللي بقوله مش عارف علمي ولا لأ ولا صحيح ولا لأ ولا أنا بتاع "تنمية بشرية" (الحمد لله) :D - ثانيا  أنا أب "مبتدئ" :D عندي بنتين واحدة 8 سنين والتانية تقريبا 8 شهور معنديش الخبرة الكافية إني أقدم نصايح بقلب جامد بس ممكن أقول اللي أنا شخصيا هعمله مع ولادي .. واللي هحاول بقدر الإمكان أحققه .. واللي معرفش إذا كان صح أو غلط .. بس أكيد أنا شايفه أحسن كتير لولادي من الأساليب اللي ناس كتير بيتبعوها في تربية أولادهم .. شوفتها مع أصحابي .. أو ناس أعرفهم أو حتي أنا شخصيا، اللي هكتبه مالوش دعوة بالدين علشان محدش يقوللي الأحسن نحفظهم ونعلمهم كذا .. أو لا دي مذكورة :) ولا بعادات علشان برضه محدش يقولي...

كتير قوي قريت بوستات لناس بيشتكوا إن ولادهم بيتكلموا كلام شبه الأفلام "الهابطة" المصرية اللي مليانة إيحاءات وقرف ما يناسبش ولادنا ... الموضوع بسيط جدااااا ... إنت إتحكم في اللي يشوفوه .. وفرجهم ع المفيد اللي ينمي عقولهم ويفيدهم !! المطلوب : 1- عدد واحد لابتوب صغير فيه وصلة HD  2- شوية أفلام كارتون ( ترفيهي علي تعليمي ) .. وأفلام ناشيونال جيوجرافيك وشوية فيديوهات تعليم لغات وعلوم ( بطريقة تناسب عمرهم ) وكل ده موجود أونلاين. 3- إعمل Playlist يومية تشتغل في الأوقات اللي هما بيتفرجوا فيها. 4-وصل اللابتوب ع التليفزيون 5- طبعا متعرفهمش إن ده كمبيوتر ومتوصل .. علشان ما ياكلوش دماغك .. لغاية ما يتعودوا. 6- تابع إنت معاهم وإتفرج زيهم وشاركهم وإسألهم. ييعني تخيل إبنك ولا بنتك بعد ما يتفرجوا علي مثلا The Theory of Everything Movieوبعد ما يتفرجوا علي "قلب الأسد"  فرق كبير هتحس بفرق كبير قوي في شخصيتهم وكلامهم ومعارفهم ومحدش فيهم هيسألك "يعني إيه سافوريا يابابا؟" #العلم_في_الراس_مش_في_الكراس #أطفال_اليوم_محمد_رمضان_المستقبل التالي بقى .....