أرض التواكل

مش عارف إيه اللى حصلنا!

بقينا متخصصين تواكل وتعليق فشل وكسل على شماعات غيرنا، ونبرر فشلنا بفشل حكومة أو مكان عايشين فيه.

بقينا بندور على تبريرات لنفسنا قبل الناس علشان ما نطلعش غلطانين، مع إنك لو قعدت شوية مع نفسك هتلاقي إنك غلطان في كتير ومحتاج تغير أكتر.

بقينا مستسلمين بطريقة مستفزة، وتفرغنا إما للمعارضة للمعارضة أو التأييد المطلق بلا حدود.

بقت حياتنا عبارة إننا نشتم بعض ونهاجم بعض، وندعي الوطنية والإنتماء وإحنا أبعد ما نكون عنها.

كل واحد فينا شايف نفسه الأصح، ومقتنع بده ومعندوش إستعداد يغيره.

المهم إن كل الحاجات دي خلقت جوانا حاجة مشوهه مالهاش إسم، عايشة على أطلال الماضي وشعارات.

عايشة على ما أشتغلش غير بشهادتي.

عايشة على .. لا لا عيب أشتغل الشغلانة دي.

عايشة على .. الحكومة المفروض تعمل.

عايشة على .. مفيش وقت .. مشغول .. مفيش فلوس أعمل.

عايشة على إننا نعلق فشلنا على فشل الغير .. ونلوم أى حد غير نفسنا.

ناس بتسميه جلد ذات ولا سلخ ذات، كأنه عيب أو كأن إنك تلوم نفسك إنك ما بتتحركش، وتحاسب نفسك ع التكاسل والتواكل بقى عيب.

مع إن دي الطريقة الوحيدة اللى هتخليك تتحرك وتشتغل على نفسك أكتر، غير كده هتفضل عايش في "سـ" و"هـ" من غير فعل، كل كلامك هيبقى كده وكل أحلامك هتعيشها بالحرفين دول.

محدش بقى يحاول، كل بيستسلم وبيقع من اول قلم.

مع إن المحاولة دي حاجة حلوة قوي.. والله ياعم.

مش لازم يكون تعليمك جامد قوي علشان تحاول.

ومش لازم تبقى ذكي قوي برضه علشان تحاول.

بس لازم يكون عندك علم، صبر، ورغبة وإرادة علشان تحاول.

على قد بساطة الكلمة بس محتاجة صبر وإرادة وإنك متزهقش، ومتقولش مفيش فايدة.

حاجات كتير قوي من اللى بنستعملها كل يوم اللي إخترعوها لو إستسلموا وما حاولوش وما إشتغلوش على نفسهم كفاية.

المحاولة يعني عملت اللي عليك بس ما جاتش معاك المرة دي، فهتحاول تاني علشان تيجي المرة التانية أو التالتة أو العشرين، مش لازم تبقى من أول مرة.

مش لازم تشتغل اللى إنت عايزه في الأول، مش لازم تشتغل اللي مكتوب في شهادتك أصلا.
شيل من حياتك كلمة مينفعش ومش هقدر، شيل الحجج.

مين فينا دخل جامعة أو معهد ودرس حاجة فعلا بيحبها أو عايزها؟!

مين فينا درس اللي هو بيحبه إلا عدد قليل؟

مين برضه بدأ حياته وإشتغل اللي هو بيحبه إلا قليلين قوي؟

أقعد مع نفسك شوف إنت عايز إيه؟ بتحب إيه؟ عايز تبقى إيه؟ وإشتغل وعلم نفسك بنفسك، طور نفسك.

هتفضل مستني البلد تعمل ؟!! طيب معملتش .. هتعلق فشلك على فشلها؟! وتقول هما اللي قالولي ؟!

مش ده الحل!

الحل إنك ...

ما تتحججش بالوقت .. ساعة في اليوم مش كتير

ما تتحججش بالفلوس .. كل حاجة موجودة أونلاين وببلاش.

ماتتحججش بالتربية ولا البيئة.. إنت نفسك لا تربيتك ولا بيئتك.. لو عايز تتغير.. هتتغير.

أيوه التربية ليها عامل كبير جدا وهبقى أتكلم عنه في موضوع تاني.. بس مش حجة

ما تتحججش بالبلد.. محدش بيشيل شيلة حد.

الحل عندك إنت... غير نفسك!