من حقي أفتي .. وأقول اللي في نفسي
فعلا الفتي كتير قوي ... كله بيفتي ... وبالذات الإخوة المعارضين للمعارضة والمعترضين عشان يبانوا فاهمين ...
فأنا قررت أفتي أنا كمان ... إشمعنى أنا ؟! O.o أنا كمواطن مصري ... من حقي أبقي محلل إستراتيجي وخبير إقتصادي ... ده حق بنكتسبه كمصريين لما بنتولد.
زي واحد النهاردة كاتب مقال طويل عريض ... متضايق قوي .. إن محدش قاله وإستأذته قبل ما يعلنوا عن مشروع العاصمة الجديدة.
هو طبعا صح ... والمفروض كان يبقى فيه تصويت ويتعرض الموضوع على مجلس الشعب .. بس هو فين مجلس الشعب ؟!! وبعدين هل هو غلط ؟ يعني المشروع غلط ؟!
هو شايف إن الموضوع غلط وإننا المفروض نحل مشاكل العاصمة القديمة بدل ما نعمل عاصمة جديدة.
وطبعا كل اللي بيعترض قافش في دي قوي .. مع إن (دحضها) سهل جدا.
عدد سكان القاهرة 9102232 حسب تعداد ٢٠١٤، لما يتنقل منهم ٥ مليون لمنطقة جديدة تماما، ونقل الوزارات والهيئات لهناك.
تخيل ده لوحده هيخف ضغط قد إيه ع الـ Grids إذا كانت بقى كهربا ... مياه ... طرق ... تليفونات ... مواصلات عامة وغيرها .... أكتر من النص تقريبا... ده هيقلل الأعطال وشبكة الكهربا تاخد نفسها وهيبقى فيه متسع للصيانة والتطوير في أي حاجة من الحاجات دي ( ده غير المحطات اللي هتتعمل واللي سيمنز تقريبا إتفقت عليها).
بعدين إتكلم عن تكلفة المشروع ... وقال إن ممكن يتعمل بيه حاجات كتير ... وقال ممكن بتكلفة المشروع نعمل خطوط مترو جديدة .. أو نبني مساكن (جوة العاصمة الحالية) :D للناس اللي مش لاقيين سكن في العاصمة الحالية ... أو نصلح الأحياء ونعملها صيانة (وهي أصلا معظمها آيل للسقوط)؛ المهم إنه بلسانه .. قال إن تكلفة كل العاصمة الجديدة هتحل بند واحد بس ( مشكلة واحدة بس ) من مشاكل العاصمة الحالية :) ، طيب أيهم أحسن ... أعمل جديد وأحرك الناس لأرض جديدة .. وآبدأ نضيف في مكان ... وأخف الضغط عن القديم علشان آعرف آنضه وأعمله صيانة ولا أحل بند واحد بس ؟!!
المهم إن مقاله أجوف ... ودليل على إنه معارض للمعارضة رغم درجته العلمية والمكان اللي شغال فيه .. بس ده ما أبعدوش عن التحيز ... وآبعده جدا عن الموضوعية والحيادية ... في الآخر مقالخ ما فرقش كتير عن مقال عبد الدحمن يوسف اللي تمني فيه الفشل والخراب للبلد .. بس تحقيقا لرغبات موزة راعية أبوه.
واحد تاني (مهندز) .. كاتب بوست طويل عريض ... بينم عن ضحالة بنت جزمة .
إفترض في البوست بتاعه إن العاصمة الجديدة هتحمل ع الشبكات القديمة -_- ، مش عارف سيادة العالم ببواطن الأمور عرف منين الموضوع ده! ومش عارف الباشمهندز ... معرفش عن إتفاقات الطاقة الجديدة والمحطات والدوشة دي علشان يكتب بوست خايب زي ده .. بيفترض فيه إن هنبني بلد كاملة عشان تشتغل من ٩ لـ ٥ ... إيه بقى؟! ها إيه ؟! ده إنت لو عيل في إبتدائي مش هتقول كده .. قالك معمولة لـ ٥ مليون .. يعني إنت عايز تقولي إن كل يوم ٥ مليون بني آدم هيصحوا من العاصمة الحالية يروحوا شغلهم في العاصمة الجديدة وبالليل يروحوا ؟! إنت حالتك متأخرة :) .
أنا شايف إن مكاسب المشروع ده كتير .. إجتماعيا وإقتصاديا .. ده رأي كمصري ... لا أنا ليا في هندسة ولا تخطيط .. ولا في الكلام ده .. بس بالهجايص كده زي سلطان ما قال .. الموضوع مش محتاج ...
أنا سرحت في الكتابة ... ودخلت في مرحلة الهري :D فهسكت أحسن لان طبعا محدش هيقرا كل ده.
Comments
Post a Comment
What do you think ? Comment here